Barita nauli taringot tu haheheon ni Jesus Kristus sian hamatean nunga marrumangkun barita klassik di portibion mamungka sian abad parjolo. Atik pe sai bahat pro kontra taringot tu fakta heheheon i, alai ianggo di Hakristenon, sada sian ojahan ni haporseaon ni halak Kristen do ia haheheon ni Jesus. Angka na so olo manghaporseai Jesus sian bona sahat tu nuaeng ingkon taringot tu haheheon ni Jesus i do diparsoada manang dialo nasida. “Ndang faktual i. Fiksi do i. Ndang akurat barita na manurathon I,” ninna nasida.  Ganup tingki, ganup ro paraloon tu ojahan ni Hakristenon on na songon i, sai dialusi halak Kristen do paraloon i denggan. Di tingkinta on pe, marroan dope na mangalosa. Ndang holan sian durunta, alai sian na adong di tongatonganta, dohot na hea rap dohot hita manghaporsea Debata. 

Siala ni i, mansai uli do barita na uli sadarion di hita punguan ni halak Kristen termasuk di HKBP barita na sian Ulaon Apostel 10: 38-43 dienet gabe jamita, ala disi ndang sian angka generasi kedua halak Kristen na manurathon evangelium disurathon (Markus, Mateus, Lukas, Johannes), na sai didok pangalo ni barita haheheon ni Jesus i ndang saksi mata, alai panindangion ni saksi mata ni Jesus i do, i ma panindangion, jamita ni apostel Petrus, na disurathon na manjaha catatan jamitana, i ma si Lukas.  Boasa ringkot i di hita nuaeng on di dekade paduahon abad pa-21-hon on. Boti: 

1.Adong do sahalak na margoar Bart. D. Ehrman di Amerika, sahalak na Kristen hian, siihuthon Jesus hian sian sihaposoonna jala uju marumur 20 taonan, pangajari Padan Naimbaru hian di Amerika, na gabe Kristen di tongatonga ni punguan ni halak Kristen na konservatif dung i gabe Karisten na liberal saleleng 15 taon, naung leleng mangihuthon Jesus Kristus songon Tuhanna jala gabe pangajari dohot peneliti na popular di hutana, naung manurat 30 buku akademis, alai mamungka taon 1990-an manadingkon haporseaonnana di haadongon ni Debata di portibion ala ndang tolapsa mamingkiri masalah ni hajahaton dohot parungkilan ni jolma  di portibion, boasa manghohom Debata pasombuhon parungkilon ni jolma, molo adong jala mangula do Ibana, jala dung i, sahat tu nuaeng atik pe pangajari taringot tu Sejarah Agama-agama do ibana di Universitas Carolina Utara di Chapel Hill, nuaeng marumur 62 taon, nunga dialo ibana hasisintong ni haheheon ni Jesus. Di taon 2014 disurat ibana sada bukku na berjudul, “Tingki Jesus Gabe Debata: Panghamuliahonon ni Jesus sada Parjamita sian Galilea.” (Hata Inggris: How Jesus Became God: The Exaltation of a Jewish Preacher from Galilee March 25, 2014).

2.Buku on bahat dituhori halak, gabe buku na laris tarjual, best seller, adong manuhorsa laho patoguhon pingkiranna na so manghaporseai haheheon ni Jesus, adong manuhorsa laho umboto aha pingkiranna, alai laos adong na manuhorsa asa mangalo argument-argumen na sinuratna.  Di bukuna i didok ibana songon on intina (Hubahasahon):  “Dung hupareso sude angka buku, dokumen uhum ni Kekaisaran Romawi taringot tu uhum silang, tangkas do na ndang adong na tarsilang ditanom. Alai ganup na tarsilang dipasombu do songon i di silang i  asa panganon ni pidong na martongatonga langit. Dalan ni parhuaso Romawi do i pabiarbiarhon angka na naeng martahi na jahat mangalo kekaisaran Romawi, ai jorbut do uhum tu nasida, i ma silang i. 

Asa, ala ndang dung ditanom Jesus, ndang adong heheheon ni Jesus sian hamatean. Ala ni i na dipatupatupa angka siseanna do barita taringot tu haheheon ni Jesus, asa porsea halak di hata ni hatahonon ni nasida. Gabus do i. Ai angka pemimpin agama jotjot do songon i, manggabusi halak, mandok na nidokna berdasar tu sada fakta historis, hape ndang. Marhite na patupatupa i dibahen nasida ma Jesus gabe Debata. Alai ianggo Jesus ndang dung diida ibana dirina Debata. Tarsongon angka keluarga ni halak na baru mate jala baru ditanom. Bornginna i manang piga ari dung i di jabu, ala ni lungun ni rohana, olo do nasida hira umbege jala marnida na mate i ro tu jabuna, tu pingkiranna, huhut umbege adong soara di dapur. Hape huting do i na mangalului sipanganon. Alai gabe i do dibaritabirathon nasida.” Tar songon i ma argumenna.

3.Mamungka sian na diparuar ibana bukkuna i, bahat ma angka na so porsea hian di hinaadong ni Debata, dohot di haheheon ni Kristus, gabe marlas ni roha. “Sintong do hape na didok rohangku saleleng on. Ndang dung hehe Jesus. Ndang boi adong binoto buktina.” Jala angka na so adong tingkina patupahon penelitian gabe humasusa. Alai bahat ma tong angka peneliti di portibion patupa penelitian laho manulingkiti manang na sintong do argument-argumen na sinurat ni Bart D. Ehrman on. 

Boha do hasilna? Ndang sadia leleng dung ruar buku i nunga migor ro hasil ni penelitian na asing na mangalo hasil penelitian ni Ehrman i. Dia ma i? Didok angka ahli na asing songon on: Sala do si Bart D. Ehrman on. Boasa? Ai ditutup ibana simalolongna tu bukti uhum na asing na sasintongna diboto ibana, holan asa mendukung argument manang pingkiranna na diojahi na so porsea i be ibana di haadongon ni Debata, jala na so hea hehe Kristus. Dia huroha na naung didapot angka ahli na asing? 

On ma: “Atik pe di sandok kekaisaran Romawi ingkon unduk do rakyat tu uhum Romawi, alai di manang piga propinsi, tarlumobi di Judea, di huta ni halak Jahudi parugamo na utusan i, dihargai kekaisaran Romawi do uhum ugamo na dihangoluhon penduduk setempat, dalam hal on di halak Jahudi. Dia ma uhum i? I ma uhum Sabat na mandok ndang jadi bangke ni halak mian di toru ni tano dung pukul 18.00. Ingkon ditanom do. Songon i do na pinamasa ni angka soldadu na mamparsilangkon Jesus i. Patuathon dua halak na tarsilang rap dohot Jesus i nang Jesus sandiri. 

I do na disurathon si panurat ni Evangelium Johannes i dung turpuk jamita di ari hamamate tgl 30.3 i, Joh 19: 38, “Dung salpu  dipangido si Josep na sian Arimatea ma tu si Latus, paijuronna bangke ni Jesus. Sisean ni Jesus do ibana, alai marsibuni do ibana, alai marsibuni do ala ni biarna mida angka Jahudi. Jadi dioloi si Latus ma i. Dung I ro ma ibana, dipaijur ma bangkena. Joh 19: 41 “Alai adong ma mardonokkon hapajalanna I sada porlak, jala di bagasan porlak I adong sada tanoman na imbaru, na so dung hapeahan ni manang ise dope. Asa tusi nama dipeakkon nasida Jesus, siala ari parhobasan ni Jahudi; ai jonok do tanoman i.”

Panurat ni Evangelium Johannes manurat taon 90-an (abad parjolo). Bart D. Ehrman manurat taon 2014. Sinurat ni ise do na sumintong? Sinurat ni na jumonok sian peristiwa historis haheheon ni Jesus do manang sinurat ni na so porsea di haadongan dohot hagogoon ni Debata do? Jala na sinuratni angka panurat evangelium i saurdot do tu cara ni panurat Romawi na tarbarita di partingkian panuratan ni evangelium i.

(Temuan ni ahli  i nunga hupasahat di kuliah umum na hupasahat di pembukaan kuliah di STT HKBP taon 2014, jala nunga diterbithon STT-HKBP i non rap dohot angka tulisan na asing. Adong dope sada nari na songon ahu mendebat si Bart D. Ehrman i, di hata Inggris na naung masuk tu youtube taringot tu haheheon ni Jesus dohot taringot tu hatoguon ni sejarah ni 4 evangelium i, i ma: Michael R. Licona )

4. Ala ni i do mansai las rohanta sadarion ala dipillit do sada turpuk jamita na manurathon taringot tu panindangion ni sada sian saksi mata, sitindangi ni haheheon ni Jesus, na so holan na rap dohot Jesus na mangula di Galilea sahat tu Judea i, na marnida ulaonna na balga i, na marhuaso mangajari, na marhuaso pamalum na marsahit, na marhuaso pabali tondi na hobar, na malo berdebat dohot angka guru ni Jahudi, na dung umbege hata ni Jesus taringot tu na ingkon manaon, mate, jala hehe Ibana di ari patoluhon, alai dohot do na naung marnida Jesus naung hehe i manang piga jom dung hehe ibana sian hamatean i, ndang holan di sada jabu rap dohot angka sisean na sampulu nari na dao sian udean i, alai apala di udean i rap dohot sisean na sada nari i ma sisean na hinaholongan ni Jesus. Ndang nipi. Ndang halusinasi. Alai simalolongna sandiri marnida di bagasan udean ni Jesus i ndang  disi be Jesus, holan angka pangalilit i nama na disi. 

Ndang songon dia Jesus hehe sian na mate i na diida ibana, alai nunga pajumpang ibana dohot Jesus rap dohot angka sisean na sampulu na asing, jala nunga ditonai Jesus ibana rap dohot angka sisean na asing asa borhat tu sandok portibion mamaritahon i. Rap dohot sisean na asing nunga diida ibana tangan ni Jesus naung tarpangku dohot andorana naung tartullang uju tarsilang i (Joh 20: 20). Jala nunga diida ibana tong Jesus na mandok tu si Thomas donganna sisean songon on: “Boan tu on jarijarimi jala ida ma tanganku! Surdukkon ma tanganmi manjama andorangku! Unang ganggu roham; sai porsea ma ho! (Joh 20: 27). Nunga manghatai Jesus naung hehe i dohot ibana asa diparmahani Jesus angka anak ni birubiru ni Jesus (Joh 21: 15-19). 

Apostel Petrus saksi mata ni ulaon, Jesus tarsilang, dohot Jesus na hehe i do na manindangi tu sahalak na so Jahudi, i ma si Kornelius dohot donganna sajabu, donganna sahuta, nang alaealena na jumonok di jabuna di Kaisaria, dung mardalan ibana sian Joppe saleleng sadari manipat, 54 kilometer daona. 

5.Adong dua na ingkon tangkas taida apala na niondolhon ni Apostel Petrus di bagas ni sahalak perwira (Letnan) tantara Romawi i, i ma na mangihut on:

Parjolo ise na pahehe Jesus i. I ma Debata: “Nunga dipahehe Debata ibana di ari patoluhon.” (Ayat 40: Gorik: Ho theos egeiren en te trite hemera ). Jala Debata do tong mangalehon tu ibana gabe patar (Gorik: ephane genestai).  Ndang apala Jesus na hehe i na niondolhon apostel Petrus on tu si Kornelius, sahalak na so halak Jahudi alai na daulat dohot na mangkabiari Debata i, alai DEBATA na pahehehon, Debata na mangalehon basabasa tu Jesus asa papatarhon dirina, ndang apala tu saluhut halak, alai tu angka siseanna si-11 halak i, na sanga ndang porsea di barita taringot tu haheheonna, alai na rap mangan dohot minum dohot ibana dung dipahehe Debata. Mangan dohot minum i do bukti fisik, bukti historis na so taralo manang ise taringot tu Jesus naung hehe i. Di pudi ni sudena i, i ma HAGOGOON NI DEBATA.  

Hagogoon ni Debata do na pahehe Jesus sian hamateanNa. Nasa na so porsea di hagogoon ni Debata tontu ndang   tarbahensa manghaporseai haheheon ni Jesus sian na mate. Alai na porsea di hagogoon ni Debata porsea do di haheheon ni Jesus. 

Ditaluhon hagogoon ni Debata do hagogoon ni hamatean. Hamatean do musu ni jolma na ummaol taluhonon ni jolma i sian na robi sahat tu tingki on. Angka ilmu teknologi kesehatan, medical technology na ummaju pe sahat tu saonnari ndang tuk dope manaluhon hamatean. Mansai bahat do hepeng dipangke angka peneliti medical technology di portibion, na didukung angka perusahaan-perusahaan na bahat hepengna laho manaluhon hamatean ni jolma i.  Diprediksi Yuval Noah Harari di bukuna, Homo Deus. A Brief History for Tomorrow(2015) do na siala ni i di ujung ni abad pa-21 on, taon 2100, gumanjang ma umum ni jolma, 85-120 taon, siala ni bantuan medis. Sahat do jolma i muse tu na mambahen daging ni jolma i mangolu manongtong? Boi do medical techonology i muse paheheon jolma naung mate, gabe songon Debata na pahehe Jesus sian hamatean?  Hamu ma mangalusi i. Alai na umporlu botoonta sian panindangion ni apostel Petrus i ma, hagogon ni Debata boi do pahehe Jesus sian na mate.

Molo hamatean nunga dipatalu Debata di bagasan haheheon dohot hapataran ni Jesus, mansai ringkot do na porsea i, na mamestahon haheheon ni Jesus i, mamestahon hagogoon ni Debata di ngolunta siganup ari, di ngolu ni bangsonta. Siala ni i, ndang adong na so tarurupi Debata di ngolunta on. Molo tung lam maju pe parbinotoan ni jolma, so tung tapasiding hagogon ni Debata di ngolunta on. 

6. Napaduahon, i ma dia do panghorhon ni Jesus naung pinahehe ni Debata Nagogo i?

Panghorhonna i do na diondolhon ni Apostel Paulus. Dia ma i? Adong dua.

Parjolo, Jesus na naung pinahehe ni Debata i do na naung tinodo ni Debata gabe panguhum di angka na mangolu ro di angka na mate. 

Paduahon, mangihuthon angka panurirang, Jaloon ni naporsea di Ibana do hasesaan ni dosa marhite sian Goarna. 

Hasesaan ni dosa di ganup na porsea di Ibana marhite sian goarNa.

Dua disi: Ibana do panguhum ni na mangolu dohot na mate, alai na porsea di Ibana, disesa dosaNa.

Na mardosa do siuhumon. Alai disesa do dosa ni na porsea di Jesus.

I do na tapestahon di ari on, i ma: Ndang angka na naeng uhumon ni Jesus be hita be, ala porsea.

Di arion, hita angka na porsea di Jesus, halak Kristen Batak, ingkon marlas ni roha ala nunga angka na porsea di Jesus hita, jala nunga angka naung disesa dosanta hita marhite Jesus, jala ala ni i ndang uhumon ni Jesus hita di ingki mangolu hita dohot di tingki dung mate hita, di tingki ari panguhuman I sogot.  Ala ni i, manang aha jala dia pe dosam, disesa Debata do marhite Jesus. 

Ala jolma pardosa do hita, ala jolma na mura madabu tu bagasan dosa do hita, sihamauliatehononnta do na naung angka na porsea hita, jala sai disesa Debata do dosanta molo porsea hita di Jesus.

Ala ni i, tapuji ma Debata sadarion ala Ibana do na pahehe Jesus sian na mate, jala nunga angka naung disesa Debata dosanta.

5. Alai sada nari tona ni hata ni Debata tu hita, i ma, songon apostel Petrus, na unduk tu panuru ni Tondi ni Debata asa laho ibana mamaritahon haheheon ni Jesus tu si Kornelius na so halak Jahudi asa gabe gabe porsea di Jesus ibana jala siala ni i gabe disesa dosana , hita pe halak Kristen Batak di sandok Indonesia on, ingkon rade do manghatindangkon haheheon ni Jesus Kristus di ngolunta on.

Molo ndang rade dope hita patupahon i saleleng on, molo baliksa gabe songon si Bart D. Ehrman ibana, gabe ndang porsea di haheheon ni Jesus, ba jamot hita, sotung uhumon ni Jesus hita di ngolu on nang dung mate hita.(*)